Бишкек, 27.07.26. /Кабар/. Каракол шаарында масштабдуу реконструкциядан өткөн муниципалдык пляж расмий түрдө ачылды. Бул тууралуу "Кабар" агенттигине шаар мэриясынан билдиришти.
Маалыматка ылайык, оңдоп-түзөөнүн алкагында пляждын аймагы толук жаңыланып, көл жээги тазаланып, кум катмары жаңыртылды. Ошондой эле эс алуучулар үчүн сейилдөөчү жолдор, беседкалар, көлөкө чатырлар, шезлонгдор, кийим алмаштыруучу жайлар, жуунуучу бөлмөлөр жана санитардык түйүндөр орнотулду.
Мындан тышкары, пляжда балдар жана спорт аянтчалары курулуп, заманбап жарыктандыруу жана видеокөзөмөл системалары киргизилди. Эс алуучулардын коопсуздугун камсыз кылуу үчүн куткаруучу борбор жана медициналык пункт да уюштурулду.
Жаңыланган пляж бир учурда миңдеген эс алуучуларды кабыл алууга ылайыкталып, шаар тургундары жана коноктор үчүн ыңгайлуу шарттарды түзөт.
