Бишкек, 09.10.25. /Кабар/. Бүгүн мэр Каныбек Адиев жетекчилиги менен Каракол шаарынын мэриясынын делегациясы Манас шаарына тажрыйба алмашуу максатында иш сапар менен келишти.
Муниципалитеттен билдиришкендей, делегациянын курамында мамлекеттик жана муниципалдык мекеме-ишканалардын жетекчилери бар.
Аларды Манас шаарынын мэри Эрнисбек Ормоков жана шаардык кеңештин төрагасы Нуртилек Болотов жылуу маанайда тосуп алышты.
Алгач, шаар башчысы келген конокторго мэриянын жана президенттин Жалал-Абад облусундагы өкүлчүлүгүнүн жаңы имаратын тааныштырды.
Андан соң жыйындар залында эки тараптуу кызматташтыкты жана достук мамилени бекемдөө максатында меморандумга кол коюлду. Ошондой эле Манас шаарында соңку 5 жыл аралыгындагы өзгөрүүлөр, ишке ашып жаткан ири долбоорлор, жаңыдан курулуп жаткан объектилер боюнча видео тасма көрсөтүлдү.
Иш-чаранын кийинки бөлүгү шаардагы мекеме-ишканалардын ишмердүүлүгүн, бир катар курулуш объектилериндеги жумуш ыргагын, парктардын ишмердүүлүгүн жеринде көрүү менен улантылды.
Иш-чаранын негизги максаты Манас шаары менен Каракол шаарынын ортосундагы достук мамилени түзүү, тажырыйба алмашуу аркылуу мамлекеттик жана муниципалдык мекеме-ишканалардын ишмердүүлүгүн жакшыртуу болуп саналат.
