Бишкек, 12.12.25. /Кабар/. Кара-Сууда пахта станциясынын жаңыланган имараты ачылды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Иш-чарага министрлер кабинетинин төрагасынын орун басары – айыл чарба министри Бакыт Төрөбаев катышып, капиталдык оңдоо иштерине 33 млн сом жумшалып, 1 788 чарчы метр үч кабаттуу объект оңдолгонун белгиледи.
Эми бул жаңы имарат Баткен, Ош жана Жалал-Абад облустарындагы дыйкан-фермерлер үчүн да министрликтин аймактык өкүлчүлүгү катары кызмат кылып, бардык ведомстволук түзүмдөрдүн ишин бир жерден аткарууга шарт түзөт.
Ошондой эле илимпоздор үчүн лаборатория, китепкана, конок бөлмөлөрү сыяктуу заманбап шарттар каралган.
Имаратта ачылган "Фермерлерди тейлөө борбору" аймактагы дыйкан-фермерлердин бардык маселелерин жеринде чечүүгө багытталган.
Маалымат үчүн: Станция 1926-1927-жылдары Фергана өрөөнүндө пахта өстүрүүнүн илимий негиздерин изилдөө үчүн негизделген жана өлкөнүн өсүмдүк өстүрүү тармагындагы маанилүү мекемелердин бири болуп келет.
