Бишкек, 26.03.26. /Кабар/. Агартуу министрлигинин Мектептик билим берүү башкармалыгынын башчысы Мелисбек Музулманов Кара-Суу районунун билим берүү уюмдарынын жетекчилери менен жолукту.
Ведомстводон маалымдашкандай, жолугушууда Музулманов 12 жылдык билим берүүгө этап-этабы менен өтүү механизми тууралуу кеңири маалымат берди.
Анын айтымында, 2025-2026-окуу жылынын сентябрынан баштап 1, 2, 5 жана 7-класстар 12 жылдык билим берүү программасы менен окуй башташты.
"Бул жылы 3-класстан 8-класска чейинкилер да кошулуп, андан ары профилдик окутууга өтүү пландалууда. Азыр профилдик билим берүүнүн концепциясы иштелип жатат. Ал бекитилгенден кийин мектептер аны кантип айкалыштырары боюнча маселелер каралат", — деди ал.
Ошондой эле ал календардык-тематикалык планга токтолуп, бул мугалимдин жылдык окуу программасын жеке чыгармачылык менен календардык планга бөлүп алышы экенин белгиледи.
Ал эми Кыргыз билим берүү академиясы тарабынан түзүлгөн план болжолдуу жол көрсөткүч гана болуп саналат жана мугалимдер аны өз каалоосуна жараша өзгөртө алары белгиленди.
