Бишкек, 02.10.25 /Кабар/. Кара-Суу жана Түптө ата-энесинен ажыраган балдарга жер тилкелери берилди. Бул тууралуу Башкы прокуратурадан билдиришти.
Маалыматка ылайык, Ош облусунун Кара-Суу жана Ысык-Көл облусунун Түп райондорунун прокуратуралары тарабынан жүргүзүлгөн текшерүүлөрдүн жыйынтыгында ата-энесинен ажыраган алты баланын мыйзамда белгиленген тартипте турак жай менен камсыздалбай келгендиги аныкталды.
Көрүлгөн прокурордук чаралардын негизинде бул балдарга турак жай куруу үчүн жер тилкелери бөлүнүп, тиешелүү укук тастыктоочу документтер тапшырылды.
