Бишкек, 26.06.25. /Кабар/. Кара-Суу шаарындагы "Манас" стадионунун курулушу бир айдан кийин толугу менен аяктап, пайдаланууга берилет. Бул тууралуу президенттин Ош облусундагы өкүлчүлүгүнөн билдиришти.
Күн мурун президенттин өкүлү Элчибек Жантаев жумушчу сапарынын алкагында стадиондун курулуш иштери менен жеринде таанышты.
Анда учурда эл аралык талаптарга жооп берген заманбап стадиондун курулушу 80 пайызга аяктап, негизги конструкциялар жана футбол талаасы даяр болгону маалымдалды.
Стадионду толук реконструкциядан өткөрүүнүн алгачкы этабында эски курулуштар алынып, гибриддик чөп төшөлүүчү оюн талаасы даярдалды. Эми көрүүчүлөр үчүн 5000 орундуу трибуна орнотулуп, үстү жабылат. Мындан тышкары, стадион түнкү жарыктандыруу, заманбап жуунучу жана кийим алмаштыруучу жайлар, чуркоо тилкеси менен камсыз болот.
Облустун башчысы подрядчы жана жергиликтүү жетекчилерге долбоорго ылайык стадионду июль айынын аягына чейин толук ишке берүүнү тапшырды.
Белгилей кетсек, "Манас" стадионунун курулушуна жалпысынан 274 млн сом каралган. Бул каражат жергиликтүү бюджеттен, Ош облусунун өнүктүрүү фондунан жана Кыргыз футбол биримдиги тарабынан бөлүнгөн.
Мындан тышкары, облус башчысы жумушчу сапарынын алкагында Кара-Суу шаарындагы таза суу жана саркынды суу чыгаруу системасынын курулушу менен да таанышып, иштердин сапаттуу жана белгиленген мөөнөттө аякташын камсыздоо боюнча тиешелүү жетекчилерге эскертүү берди.
