Бишкек, 17.07.26. /Кабар/. Кара-Кулжа районуна караштуу Ылай-Талаа айылында Т. Назаров атындагы жаңы мектеп курулууда.
Курулуш, архитектура жана турак жай-коммуналдык чарба министрлигинен билдиришкендей, курулуш республикалык бюджеттин эсебинен каржыланып, объекттин жалпы наркы 124 млн сомду түзөт.
"Долбоор боюнча мектептин жалпы аянты 1630 чарчы метрди түзүп, 150 окуучуга ылайыкталган. Имарат заманбап талаптарга ылайык курулуп, эки кабаттуу окуу корпусунан, өтмө галереядан жана спорт залдан турат. Мындан тышкары, аймакка кичи футбол талаасы, волейбол жана баскетбол аянтчалары курулат", - деп айтылат маалыматта.
Объекттин курулушу 2025-жылдын май айында башталган. Бүгүнкү күндө лифт орнотулуп, жылытуу жана өрт өчүрүү системаларын монтаждоо иштери жүргүзүлүүдө.
