Бишкек, 17.04.25. /Кабар/. Кара-Кулжа районунда 4 гектар аянтка заманбап автобекет жана коомдук-маданий борбор курулат. Бул тууралуу президенттин Ош облусундагы өкүлү Элчибек Жантаев районго болгон жумушчу сапарынын алкагында маалым болду.
Өкүлчүлүктөн билдиришкендей, жаңы долбоорго ылайык, жергиликтүү тургундар жана райондун коноктору үчүн бардык талаптарга жооп берген, 3 кабаттуу коомдук-маданий борбор салынып, анын айланасында бардык айыл аймактарга багытталган жүргүнчү ташуучу автобекет курулат.
Иш сапардын жүрүшүндө облус башчысы долбоордун баштапкы үлгүсү менен таанышып, пландалган иштер боюнча жергиликтүү бийлик өкүлдөрүнө жана тиешелүү жетекчилерге бир катар сунуштарды берди. Ошондой эле ал долбоор сапаттуу жана өз убагында аткарылышы керектигин баса белгилеп, конкреттүү тапшырмаларды койду.
Бул ири долбоор президент Садыр Жапаровдун түз колдоосу жана Элчибек Жантаевдин аракети менен Кара-Кулжа районунун инфраструктурасын жакшыртууга, калкка ыңгайлуу шарттарды түзүүгө жана жаңы жумуш орундарын түзүүгө багытталган.
