Бишкек, 23.05.26. /Кабар/. Бүгүн Кара-Кулжа районунун Биймырза айылында жаңы, заманбап спорт комплекси ачылды. Бул тууралуу президенттин Ош облусундагы өкүлчүлүгүнөн билдиришти.
Иш-чарага катышкан президенттин өкүлү Аманкан Кенжебаев элдин саламаттыгы жана билимдүүлүгү – мамлекеттин негизи экенин белгиледи.
"Биз мындай демилгелерди, айрыкча жеке ишкерлердин коом үчүн жасаган аракеттерин ар дайым колдойбуз. Бул – өлкөбүздүн өнүгүүсүнүн белгиси. Бир кабаттуу спорт комплекси айыл жаштарына спорттук чеберчилигин өркүндөтүүгө жана сергек жашоо образын калыптандырууга ыңгайлуу шарт түзөт", – деген өкүл жеке ишкерлердин салымын жогору баалап, алардын демилгесин колдоого аларын билдирди.
Белгиленгендей, комплекстин жалпы наркы 19,7 млн сомду түздү. Анын ичинен 11,2 млн сом жергиликтүү бюджеттен бөлүгөн. Ал эми 7,5 млн сомун жеке ишкерлер берип, 1 млн сому айыл тургундарынан чогултулган.
