Бишкек, 23.09.25. /Кабар/. Жайыл районунда Кара-Балта тигүү цехинин мурдагы имараты мамлекеттин балансына кайтарылды. Бул тууралуу УКМКдан билдиришти.
Атайын кызмат тарабынан жүргүзүлгөн иш-чаралардын алкагында Кара-Балта шаарындагы Гвардейская көчөсү 18 дарегинде жайгашкан, жалпы аянты 12 400 чарчы метр болгон мурдагы Кара-Балта тигүү цехинин имараты мамлекеттин балансына кайтарылды.
Белгиленгендей, буга чейин 1992-жылы И.Р.И. аттуу жаран Кара-Балта шаарындагы тигүү цехинин директору болуп турган кезде аталган объектини өзүнүн жакын тууганынын атына менчиктештирип алганы аныкталган.
Көрүлгөн чаралардын натыйжасында аталган тигүү цехинин ээси мүлккө ээлик кылуусунун мыйзамсыздыгын мойнуна алып, өз ыктыяры менен мамлекеттин балансына кайтарып берди.
