Бишкек, 18.06.26. /Кабар/. Кара-Балта дарыясынын жээги көрктөндүрүлөт. Бул тууралуу Курулуш, архитектура жана турак жай-коммуналдык чарба министрлигинен билдиришти.
Учурда Шаар куруу жана архитектура департаментинин архитекторлору тарабынан эскиздик долбоор иштелип чыкты.
Көрктөндүрүү дарыянын Жайыл баатыр көчөсү менен кесилишкен аймагында жүргүзүлөт.
Долбоордо көчөлөрдү жарыктандыруу, отургучтарды жана таштанды урналарын орнотуу, жашыл аймактарды түзүү, жөө жүргүнчүлөр жана майыптыгы бар жарандар үчүн ыңгайлуу жөө жүрүү жолдорун салуу, ошондой эле параллелдүү унаа токтотуучу жайларды уюштуруу каралган.
Мындан тышкары, аймактын транспорттук жеткиликтүүлүгү да эске алынган.
