Бишкек, 11.02.26. /Кабар/. Жалпы кубаттуулугу 1 860 МВт болгон “Камбар-Ата-1 ГЭСин куруу” долбоорунун алкагындагы иштер пландалган графикке ылайык ырааттуу уланууда. Бул тууралуу Энергетика министрлигинен билдиришти.
Маалыматка ылайык, учурда гидроэлектр станциясын курууга даярдык иштери активдүү жүрүп жатат. Алардын катарына электр линияларын тартуу, жумушчулар үчүн шаарча куруу, көпүрө жана унаа жолдорун салуу сыяктуу инфраструктуралык иштер кирет.
Бүгүнкү күндө төмөнкү негизги жумуштар аткарылды:
- Бишкек–Ош унаа жолунун 318-чакырымынан Прорез №2ге чейинки узундугу 8,6 чакырым болгон жол толугу менен бүткөрүлүп, объектти кабыл алуу иштери жүрүүдө;
- Прорез №2ден Камбар-Ата-1 ГЭСинин тушуна чейинки 4,7 чакырым жолдун 4 чакырымы (95 пайызы) бүткөрүлдү;
- Узундугу 126 метр болгон ТТ-2 транспорттук туннелинде бургулоо жана бетон иштери толугу менен аяктап, объект 100 пайыздык даярдык менен кабыл алуу стадиясында;
- 110 кВ аба электр линиясынын 11,5 чакырымы толук тартылып, 25 даана мамы орнотулду. 110/6 кВ көмөк чордондогу негизги иштер 90 пайызга аяктоодо;
- 100 адамга ылайыкташкан административдик корпус, жатакана, ашкана жана кошумча объекттердин курулушу 60–70 пайыз аткарылды;
- Нарын дарыясы аркылуу ГЭСтин оң жээгине өтүүчү, узундугу 180 метрден ашык көпүрөнүн төрт бетон тирөөчү толук бүткөрүлүп, учурда металл конструкцияларын монтаждоо иштери жүрүп жатат. Жалпы даярдык 50–60 пайызды түзөт;
- ТТ-2 туннелинин эксплуатациялык мезгилине карата курулуш-монтаж иштеринин алкагында 1 387 метр бетон жол толук бүткөрүлүп, ички конструкциялык иштер уланууда. Даярдык деңгээли 55–60 пайыз.
