Бишкек, 06.08.25. /Кабар/. Камбар-Ата-1 ГЭСинин негизги курулушун баштоого даярдык иштери жигердүү уланууда. Бул тууралуу Энергетика министрлигинен билдиришти.
Маалыматка караганда, учурда жабдууларды жана материалдарды жеткирүү үчүн транспорттук тоннелдин курулушу толугу менен аяктады.
Ошондой эле дамбага жана курулуш аянтчаларына жетүүчү жаңы унаа жолдордун курулушу 70 пайызга бүткөрүлүп, тоннелдин ичиндеги бетондоо, жарык берүү жана желдетүү системаларын орнотуу жана ВЛ-110 кВ аба чубалгыларын тартуу жана ПС 110/6 кВ көмөк чордонун куруу иштери 60 пайызга аткарылды.
Мындан тышкары, вахталык шаарчанын курулушу уланууда, аны менен жумушчулар үчүн жашоо жана иш шарттары түзүлөт.
Нарын дарыясынын үстүнөн өтүүчү көпүрөнүн курулуш иштери башталган.
Белгиленгендей, долбоор бардык коопсуздук жана сапат талаптарына ылайык, так график боюнча ишке ашырылып жатат.
