Бишкек, 29.06.26. /Кабар/. Кадамжай районуна караштуу Ак-Турпак айыл аймагынын 7 айылы таза суу менен камсыз болот. Бул тууралуу аймактагы өкүлчүлүктөн билдиришти.
Аталган аймакты таза суу менен камсыздоо демилгесин III жана IV Элдик курултайдын делегаттары Бердикул Аширов менен Муса Момуналиев көтөрүп чыгышкан.
Учурда бул маселе Дүйнөлүк банк каржылаган "Климаттын өзгөрүшүнө туруктуу суу чарба кызматтарын жакшыртуу" долбоорунун алкагында чечилүүдө. Долбоорго өлкө боюнча 31 айыл тандалып алынган, анын ичинен 28и Баткен облусунда болсо, анын 7си Ак-Турпак айыл аймагына карайт.
Ак-Турпак айыл өкмөтүнүн башчысы Жээнбек Макканбаевдин айтымында, учурда 2 тик суу кудугу жана 3 суу кампасы үчүн жерлерди трансформациялоо иштери аяктады. Кызыл-Коргон айылында 100 метр тереңдикте кудук казылып, алынган суу лабораториялык текшерүүдөн өткөрүлүп, ичүүгө жарактуу экени тастыкталды.
"Алдыда суу түтүктөрүн тартуу иштери башталат. Долбоордун алкагындагы курулуш иштери 2027-жылы толугу менен аяктап, 7 айылдын тургундары таза суу менен камсыз болот", — деп айтылат маалыматта.
