Бишкек, 29.01.25. /Кабар/. Кадамжай районундагы Торговый базарын иретке келтирүү иштери башталды. Бул тууралуу президенттин аймактагы өкүлчүлүгүнөн билдиришти.
Маалыматка ылайык, бүгүн базардын айланасындагы кызыл сызыктан чыгып кеткен мыйзамсыз курулуштар, башаламан соода жүргүзүү, тартип, тазалык маселелери боюнча соодагерлерге түшүндүрүү иштери жүргүзүлүп, 2-февралга чейин соода жүргүзгөн жайларын мыйзам чегинде иретке келтирүү эскертилди.
Ош - Баткен - Раззаков жолунун 175-чакырымында жайгашкан Торговый базарында унаа токтоочу жайдын жоктугунан, унаалар жол четине токтоп, кооптуу абал жаралган. Ал эми соодагерлердин тартипсиздигинен, жөө жүрүүчү тротуарлар азык түлүк сатуучу жайга айланган.
Президенттин Баткен облусундагы өкүлү Айбек Шаменовдун тапшырмасына ылайык, 2-февралдан тарта облус аймагындагы ири базарларды жана негизги көчөлөрдү иретке келтирүү, мыйзамсыз курулуштарга бөгөт коюу иштери башталат. Мындай чара жарандардын коопсуздугун жана саламаттыгын сактоо, ыңгайлуу шарт түзүү максатында көрүлүүдө.
