Бишкек 02.04.25 /Кабар/. Кадамжайда өрүктүн эрте бышкан түрүн өстүрүү колго алынды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Министрлер кабинетинин төрагасынын орун басары - айыл чарба министри Бакыт Төрөбаев жумушчу сапарынын алкагында Кадамжай районунун Кыргыз-Кыштак айылында өрүктүн ультра эрте түшүм берген заманбап бакта көчмө жыйын өткөрдү.
Ага Айыл чарба министрлиги менен жергиликтүү мамлекеттик органдардын жетекчилери катышты.
Жыйындын жүрүшүндө долбоордун артыкчылыктары талкууланып, аны башка аймактарга жайылтуу маселелери каралды.
Белгилей кетсек, бакты отургузуу бир нече этапка бөлүнгөн. Негизинен 160 метр тереңдиктеги кудук (скважина) бургуланып, суу сактагыч, тамчылатып сугаруу системасы жана тосмо GPS жабдуулары менен такталып долбоорлонгон.
Мында өрүктүн ультра эрте сорттору отургузулуп, сугаруу үчүн заманбап материалдарды колдонуу менен тамчылатып сугаруу системасы ишке киргизилген.
Ага катар климаттын оор шарттарына карата суунун туруктуу көлөмү аныкталып, 6500 м³ суу сактагыч курулган.
Жыйындын соңунда аталган долбоорду облустун башка аймактарына жайылтуу жана тажрыйба алмашуу боюнча семинарларды өткөрүү тууралуу бир катар чечимдер кабыл алынды.
