Бишкек, 07.10.26. /Кабар/. Бүгүн, 7-октябрда Кыргыз улуттук "Кабар" маалымат агенттиги 2026-жылдын 27–30-июль күндөрү өткөн Шанхай кызматташтык уюмуна (ШКУ) мүчө мамлекеттердин ЖМК жана аналитикалык борборлорунун медиафорумун уюштурууга жана өткөрүүгө колдоо көрсөткөн мамлекеттик мекемелерге, өнөктөштөргө жана ыктыярчыларга ыраазычылык каттарын тапшырды.
Эскерте кетсек, бул ири эл аралык форум Кыргызстандын ШКУдагы төрагалыгынын алкагында уюштурулуп, ага дүйнөнүн 26 өлкөсүнөн 250дөн ашык өкүл катышкан.
Иш-чараны жогорку деңгээлде өткөрүүгө кошкон салымы үчүн төмөнкү мекемелерге ыраазычылык билдирилди:
- Улуттук тарых музейи;
- "Кыргыз маданият сервис" мамлекеттик ишканасы;
- "Кыргызстан аэропорттору" ААКсы;
- "Ала-Арча" мамлекеттик резиденциясы;
- "Ала-Арча" мамлекеттик жаратылыш паркы;
- Ж. Баласагын атындагы Кыргыз улуттук университети.
"Кабар" агенттигинин директору Медербек Шерметалиев өнөктөштөргө терең ыраазычылык билдирип, алардын колдоосу форумдун ийгиликтүү өтүшүнө чоң өбөлгө болгонун белгиледи. Ошондой эле өнөктөштөрдүн иштерине ийгилик каалап, агенттик мындан ары да тыгыз жана жемиштүү кызматташууга даяр экенин баса белгиледи.
Мындан тышкары форумду уюштурууга демөөрчүлүк жана өнөктөштүк колдоо көрсөткөн ишканаларга да ыраазычылык каттары менен эстелик белектер тапшырылды. Алардын катарында "Кыргызалтын" ААК, "Кумтөр Голд Компани" ЖАК, "MEGA" улуттук байланыш оператору, "Кыргыз Коньягы", "Шоро", "Кыргыз Курут", "Алайку Органик" компаниялары, "Алыкул" кемеси, "Супара" этнокомплекси, "Мамлекеттик камсыздандыруу уюму" ААКсы, "Ала-Тоо Резорт" тоо-лыжа базасы жана Назира Бегим негиздеген "Кыргызстан мода индустриясы" компаниясы бар.
Иш-чаранын соңунда форумга келген чет элдик делегаттарды тосуп алууда, коштоодо жана башка уюштуруу иштерине жигердүү катышкан ыктыярчыларга да өзгөчө ыраазычылык билдирилип, Грамоталар тапшырылды.
