Бишкек, 20.01.26. /Кабар/. Мамлекеттик салык кызматынын төрагасы Алмамбет Шыкмаматов Италияга болгон иш сапарынын алкагында Виченца шаарында өткөн Vicenzaoro эл аралык зергерчилик көргөзмөсүнө барды.
Иш-чаранын жүрүшүндө Салык кызматынын төрагасы зергерчилик тармагындагы жаңы багыттар, колдонулуп жаткан материалдар жана технологиялар менен таанышып, италиялык алдыңкы зергерчилик компанияларынын жетекчилери жана өкүлдөрү менен жумушчу жолугушууларды өткөрдү.
Анда Кыргызстанда зергерчилик өндүрүшүн өнүктүрүүнүн келечеги, заманбап технологияларды киргизүү, адистерди даярдоо, ошондой эле инвестиция тартуу жана эл аралык компаниялар менен кызматташуу мүмкүнчүлүктөрү талкууланды.
Натыйжада италиялык өндүрүүчүлөрдүн Кыргызстандагы рынокту изилдөө жана биргелешкен долбоорлорду иштеп чыгуу боюнча макулдашууга жетишилди.
