Бишкек, 19.11.25. /Кабар/. Бүгүн Экономика жана коммерция министрлигинин имаратында "Кыргыз Экспорт" борбору тигүү жана текстиль ишканалары үчүн диалог аянтчасын өткөрдү.
Ведомстводон маалымдашкандай, учурда тигүү тармагынын өкүлдөрү кыргыз продукциясын Россиянын аймагына киргизүүдө, ошондой эле Wildberries маркетплейсине чыгууда кыйынчылыктарга туш болушууда.
Жолугушуунун жүрүшүндө Wildberries`тин өкүлдөрү аянтчага чыгуу талаптарын, документтер, маркировка, сертификация жана логистика менен иштөөнүн өзгөчөлүктөрүн кеңири түшүндүрүштү.
Тараптар түзүлгөн кырдаалдан тез арада чыгуу жолдорун, тоскоолдуктарды жоюу чараларын жана продукциянын тышкы рынокторго тез чыгуу шарттарын талкуулашты.
Ошондой эле тигүү тармагынын өкүлдөрүнө "Кыргыз Экспорт" борбору жылдын аягына чейин ишкерлер үчүн бир катар окутуу иш-чараларын өткөрө турганы маалымдалып, окуудан калбай, активдүү катышууга чакырышты.
Белгиленгендей, иш-чарага Мамлекеттик салык кызматынын, Стандартташтыруу жана метрология борборунун, "Альфа Телеком" ЖАКтын, Соода-өнөр жай палатасынын жана тиешелүү ассоциациялардын өкүлдөрү катышты.
