Бишкек, 03.10.25. /Кабар/. Бишкек, Ош жана Манас аймактарындагы коомдук тамактануу тармагынын ишкерлерлерине фискалдык программалык камсыздоону киргизүү боюнча пилоттук долбоордун алкагында окутуу өткөрүлдү.
Мамлекеттик салык кызматынан билдиришкендей, окутууда ишкерлер фискалдык программалык камсыздоонун негизги өзгөчөлүктөрү, анын иштөө принциби, салыктык жана бухгалтердик эсепке алуудагы ролу тууралуу кеңири маалымат алышты.
Эске салсак, фискалдык программалык камсыздоону киргизүү боюнча пилоттук долбоор 2025-жылдын 1-сентябрынан тартып коомдук тамактануу тармагында, ал эми 1-октябрынан баштап мейманканаларда ишке кирди. Ошондой эле, долбоор 2026-жылдын 1-февралынан тартып май куюучу станцияларда колдонууга киргизилет.
Фискалдык программалык камсыздоо – бул салык төлөөчүлөрдүн ички эсепке алуу системасы болуп саналат. Ал салыктык жана бухгалтердик эсепке алууну автоматташтыруу менен бирге бизнес процесстерди жеңилдетет.
Ал салык кызматынын системаларына түздөн-түз интеграцияланып, сатуулар тууралуу маалыматты берүүгө жана эсептик системанын өзүнөн эле ККМ чек түзүүгө мүмкүндүк берет.
Салык кызматы фискалдык программалык камсыздоону киргизүү менен салыктык отчеттуулуктун сапатын жогорулатуу жана көмүскө экономиканы кыскартуу максатын көздөйт.
