Бишкек, 17.11.25 /Кабар/. Бүгүн Бишкек шаарында "Баткен облусунун Лейлек районундагы Жалпы дарыгерлер практикалык борборунун техникалык базасын түзүү жана инфраструктурасын жакшыртуу" долбоору боюнча үч тараптуу меморандумга кол коюлду.
Президенттин аймактагы өкүлчүлүгүнөн билдиришкендей, иш-чарага экономика жана коммерция министри Бакыт Сыдыков, Индиянын Кыргызстандагы элчиси Бирендер Сингх Ядав жана президенттин Баткен облусундагы өкүлүнүн орун басары Жаныбек Исаков катышты.
Аталган долбоорду Индия каржылайт, гранттык долбоордун суммасы 126 млн сомду түзөт.
Мындан сырткары, тараптар, Баткен облусунун аймагында дарылык каситке ээ болгон баалуу ферула өсүмдүгүн өстүрүү жана кайра иштетүү багытында биргелешкен долбоорлорду ишке ашырууну талкуулашты.
