Бишкек, 04.11.25. /Кабар/. 1-4-ноябры күндөрү Стамбул шаарында Ислам кызматташтык уюмунун (ИКУ) курамындагы Экономикалык жана соода кызматташтык боюнча туруктуу комитеттин 41-министрлер жыйыны өттү.
ТИМден билдиришкендей, иш-чарага Кыргызстандын Түркиядагы элчиси Руслан Казакбаев жетектеген кыргыз делегациясы катышты.
Жыйынды Түркия президенти Режеп Тайып Эрдоган ачты. Быйылкы жыйындын негизги темасы — “ИКУга мүчө өлкөлөрдө экспорт стратегияларын өнүктүрүү жана өркүндөтүү” болду.
Иш-чаранын жүрүшүндө катышуучу мамлекеттер сооданы жеңилдетүү, жеке секторду өнүктүрүү, финансылык кызматташтыкты тереңдетүү, санариптик жактан алдыга жылуу, айыл чарбадагы өндүрүмдүүлүктү жогорулатуу жана туруктуу туризмди илгерилетүү сыяктуу маселелерди талкуулады.
