Бишкек, 07.10.25. /Кабар/. III КМШ оюндарында кыргыз спортчулары байдарка менен сууда сүзүү боюнча эки күмүш медаль утту. Бул тууралуу Дене тарбия жана спорт агентигинен билдиришти.
Маалыматта белгиленгендей, Азербайжандын Мингечевир шаарындагы “Кюр” олимпиадалык окуу-спорт борборунда байдарка менен сүзүү боюнча мелдештер жыйынтыкталды.
500 метрлик аралыктын жуптук жарышында Кыргызстандын спортчулары Урмат Ыманбеков менен Эрбол Сарыкалпаков экинчи орунду ээлеп, күмүш медаль тагынды.
Жалпысынан эки күндүк мелдеште кыргызстандык байдаркачылар жалпы үч медаль жеңди.
Белгилей кетсек, Кыргызстандын спортчулары Азербайжандагы III КМШ оюндарына катышууда. Мелдештердин программасына ылайык, 23 спорт түрү боюнча 246 медаль топтому ойнотулат. Аталган оюндарга Кыргызстандан 126 спортчу барган. 17 жашка чейинки спортчулар спорттун 15 түрү боюнча күч сынашат.
