Бишкек, 06.10.25. /Кабар/. 4-октябрда Азербайжандын Гянджа шаарында III КМШ оюндарынын алкагында эркин күрөш жана кыз-келиндер күрөшү боюнча мелдештер жыйынтыкталды.
Дене тарбия жана спорт мамлекеттик агенттигинен билдиришкендей, беттештер аталган шаардын Олимпиадалык спорт комплексинде өттү.
Кыргызстандын атынан жалпы алты балбан таймашка чыкты.
Кыз-келиндер күрөшү боюнча:
– 65 кг чейинки салмак категориясында Аяна Асамаликова финалда жеңишке жетип, алтын медаль утуп алды. Ал ушул турнирдеги Кыргызстандын алгачкы чемпиону болду.
– 57 кг салмак категориясында Сезим Жолдошбекова экинчи орунду ээлеп, күмүш байгеге ээ болду.
Эркин күрөш боюнча:
– 55 кг салмак категориясында Ринат Солтоев күмүш медаль тагынды.
– 48 кг салмак категориясында Адил Карыпбеков коло байгени жеңип алды.
Белгилей кетсек, 28-сентябрда Азербайжанда башталган Көз карандысыз Мамлекеттер Шериктештигинин (КМШ) III оюндары 8-октябрда жыйынтыкталат.
Жалпысынан III КМШ оюндарында 13 өлкөдөн келген 1624 спортчу күч сынашууда.
Эскерте кетсек, I КМШ оюндары Татарстандын Казань шаарында өткөн, ал эми II КМШ оюндары Беларуста уюштурулган.
