Бишкек, 04.07.25. /Кабар/. Бишкектеги Гапар Айтиев атындагы Кыргыз улуттук көркөм сүрөт искусство музейинде сүрөтчү, Кыргыз Республикасынын эмгек сиңирген маданият ишмери Абдысадыр Турусбековдун жеке көргөзмөсү ачылды.
Экспозиция «жан дүйнө сүрөт жалгашы» деген аталышта уюштурулду. Көргөзмө бардык каалоочулар үчүн ачык болуп, 20-июлга чейин уланат.
Көргөзмө сүрөтчүнүн жетилген чыгармачылык мамилесин ачып көрсөтөт. Экспозицияда композициялар, пейзаждар жана портреттер коюлган. Темалар ар түрдүү болгону менен, бардык эмгектер сүрөтчүнүн бирдиктүү жана бүтүндүү дүйнөсүн чагылдырат.
« Жан дүйнө— бул терең ички нерсе. Аны ичтен жарык кылып, бул абалды образ, сүрөт аркылуу жеткирүүгө аракет кылдым», — деп белгиледи Абдысадыр Турусбеков.
Сүрөтчүнүн стили өзгөчө таанымал, ак ниеттүүлүк менен айырмаланат. Ал сүрөттөрү менен бирге өзүнүн ички жан дүйнөсүн көрсөтөт.
Абдысадыр Турусбеков 1953-жылы Талас облусунун Арал айылында туулган. 1997-жылдан бери Сүрөтчүлөр союзунун мүчөсү. Ал станоктук живопись жаатында чебер, республикалык жана эл аралык көргөзмөлөрдүн катышуучусу.
