Бишкек, 16.10.25 /Кабар/. Күн мурун Бишкектеги Д. Өмүрзаков атындагы стадиондо 2026-жылы өтүүчү Азия кубогунун (U-17) тандоо турунун алкагында Кыргызстан менен Өзбекстандын курама командаларынын беттеши өттү.
Кыргызстандын футбол союзунан билдиришкендей, беттеште Кыргызстандын кыз-келиндер командасы 2:1 эсебинде жеңишке жетишти. Голду 35-мүнөттө Сумая Махаматсалиева, 49-мүнөттө Акмарал Саякбаева киргизген.
Тандоо баскычына жалпысынан 27 курама команда сегиз тайпага бөлүнүп катышууда.
Белгилей кетсек, 2026-жылы Кытайда өтө турган Азия кубогунун (U-17) финалдык баскычына ар бир тайпадан эң мыкты командалар гана чыгат.
Испаниялык машыктыруучу Антонио Меса жетектеген Кыргызстандын 17 жашка чейинки кыз-келиндер курамасы Индия жана Өзбекстандын командалары менен G тайпасында ойноп жатат.
