Бишкек, 17.09.26. /Кабар/. Эверестке бир альпинисттин чыгышы орточо эсеп менен 60 миң долларды талап кылат. Бул тууралуу Непалдын альпинизм ассоциациясынын башкы катчысы Раджендра Лама РИА Новостиге билдирди.
Анын айтымында, чет элдик альпинист үчүн Эверестке профессионалдуу уюштурулган экспедициянын баасы болжол менен 45-70 миң долларды түзөт. Ал эми жеке же премиум деңгээлдеги экспедициялардын баасы мындан да жогору болушу мүмкүн.
Бул суммага тоого чыгуу үчүн милдеттүү төлөм да кирет. Учурда жазгы сезондо Эверестке чыгуу үчүн төлөм 15 миң долларга чейин көтөрүлгөн.
“Башка треккингдик чокуларга чыгуу кыйла арзан, бирок баасы маршрутка жана көрсөтүлүүчү кызматтардын түрүнө жараша өзгөрөт. Мисалы, россиялык альпинисттер арасында популярдуу Мера чокусуна чыгуу үчүн жазында 350 доллар, башка мезгилдерде 175 доллар төлөнөт”, — деди Лама.
Ал тоого чыгуу үчүн төлөнүүчү жыйым менен экспедициянын жалпы наркын айырмалоо керектигин белгиледи. Экспедициянын жалпы чыгымына гиддердин кызматы, камсыздандыруу, керектүү жабдуулар жана логистика да кирет.
Эверест — деңиз деңгээлинен 8848 метр бийиктикте жайгашкан дүйнөдөгү эң бийик тоо. Ага чыгуу альпинисттер арасында эң абройлуу багыттардын бири болуп эсептелет.
