Бишкек, 07.07.25. /Кабар/. Курулуш, архитектура жана турак жай-коммуналдык чарба министри Нурдан Орунтаев жана президенттин администрациясынын жетекчисинин орун басары Азамат Кадыралиев "Жыргалаң" тоо курортундагы "Ала-Тоо Резорт" тоо-лыжа кластеринин курулушу менен таанышты.
Курулуш министрлигинен билдиришкендей, жылына 2 миллионго чейин конокторду кабыл алууга эсептелген комплекстин 3D эскизи даярдалды.
Башкы план жана долбоорлоо документтери шаар курулуш жана архитектура башкармалыгы тарабынан "Ала-Тоо Резорт" мамлекеттик ишканасы менен биргеликте иштелип чыккан. Учурда долбоорлоо иштери аяктап, курулуш иштери башталды.
Ошондой эле "Жыргалаң" курорттук шаарча инженердик-геологиялык изилдөөлөрдөн өтүп, 5-4-3 жылдыздуу мейманкана, администрациянын имараты, медициналык пункт, атайын техникалар жана өзгөчө кырдаалдар үчүн каралган жай боюнча долбоордун архитектуралык бөлүгү иштелип чыкты.
Белгилей кетсек, аталган ири долбоор президент Садыр Жапаров тарабынан демилгеленип, учурда курулуш иштери жүрүп жатат.
