Бишкек 22.05.25. /Кабар/. Ош облусунун Өзгөн районундагы Мырза-Аке айылында заманбап үч кабаттуу, 60 орундуу жаңы оорукана ишке берилди.
Саламаттык сактоо министрлигинен маалымдашкандай, ачылыш аземине министрлер кабинетинин төрагасы Адылбек Касымалиев, саламаттык сактоо министри Эркин Чечейбаев, Жогорку Кеңештин жана жергиликтүү кеңештин депутаттары, медицина кызматкерлери жана жергиликтүү тургундар катышты.
Саламаттык сактоо министри Эркин Чечейбаев өз сөзүндө бул оорукана аймактын калкы үчүн медициналык жардамдын жеткиликтүүлүгүн жана сапатын жогорулатууга багытталган маанилүү долбоор экенин белгиледи.
"Бул — калктын саламаттыгын жакшыртууга карай маанилүү кадам. Биздин максат — мындай мекемелер элге сапаттуу медициналык кызмат көрсөтүп, узак жылдар бою кызмат кылышы керек", — деди министр.
Жаңы ооруканада төрөт, терапия, хирургия, педиатрия жана тез жардам бөлүмдөрү бар. Ал заманбап медициналык жабдуулар — ӨЖД (ИВЛ) аппараттары, УЗИ, рентген жабдуулары жана лабораториялык жабдыктар менен камсыздалган. Мунун аркасында жаш балдар, кош бойлуу аялдар жана улгайган адамдар өз аймагында эле зарыл болгон медициналык жардамды ала алышат.
Аталган оорукана өкмөттүн жана Саламаттык сактоо министрлигинин колдоосу менен заманбап стандарттарга ылайык курулду.
Белгилей кетсек, учурда өлкө боюнча республикалык бюджеттин эсебинен 21 ири медициналык объект курулуп, 12 мекемеде капиталдык оңдоо иштери улантылып жатат.
