Бишкек, 01.07.26. /Кабар/. Энергетика министрлиги ички рыноктогу күйүүчү-майлоочу материалдардын абалын күн сайын көзөмөлдөп жатат.
Ведомствонун маалыматына караганда, учурда республикада КММдин жетиштүү запасы түзүлдү жана жеткирүү иштери келишимдердин негизинде туруктуу жүрүүдө.
Жакынкы Чыгыштагы геосаясий чыңалуу жана дүйнөлүк баалардын өсүшү ички рынокко таасирин тийгизип жаткандыктан, өлкөнүн энергетикалык коопсуздугун сактоо боюнча ыкчам чаралар көрүлүүдө.
"Учурда күйүүчү майды үзгүлтүксүз ташуу максатында Россия, Казакстан, Беларусь, Азербайжан, Өзбекстан жана Түркмөнстандын мамлекеттик органдары менен сүйлөшүүлөр жүрүүдө", — деп айтылат маалыматта.
Мындан тышкары, жакында эле президенттин атайын тапшырмалар боюнча өкүлү Бакыт Төрөбаев, министрлер кабинетинин төрагасынын орун басары — айыл чарба министри Эрлист Акунбеков жана энергетика министри Алтынбек Рысбеков баштаган жетекчилер "Жунда" мунай иштетүүчү заводуна жана "Кыргызнефтегаз" ишканасына барып, өндүрүш көлөмүн көбөйтүү тапшырмаларын беришти.
Ошондой эле Монополияга каршы жөнгө салуу кызматы нефтетрейдерлер менен биргеликте баа саясатын жана логистика маселелерин тынымсыз көзөмөлгө алууда.
Энергетика министрлиги өлкөнү күйүүчү май менен камсыздоо иши пландуу түрдө уланып жатканын жана абал мамлекеттин туруктуу көзөмөлүндө экенин баса белгилейт.
