Бишкек, 14.09.25. /Кабар/. Улуттук эне жана баланы коргоо борборуна Rebless™ Planar инновациялык реабилитациялык жабдуусу тапшырылды.
Саламаттык сактоо министрлигинен билдиришкендей, жабдуулар гуманитардык линия боюнча KOICA (Кореянын эл аралык кызматташтык агенттиги) жана кореялык H Robotics компаниясынын көмөгү менен алынып келинди. Жабдуунун наркы — 150 миң АКШ доллары.
Rebless™ Planar — неврологиялык жана ортопедиялык оорулардан кийинки бейтаптарда кыймыл-аракетти жана күчтү калыбына келтирүү үчүн колдонулуучу жогорку технологиялык робот-тренажёр.
Саламаттык сактоо министри Эркин Чечейбаев Корея өкмөтүнө, KOICAга жана H Roboticsке Кыргызстандагы медициналык реабилитацияны өнүктүрүүгө тынбай колдоо көрсөтүп жаткандыгы үчүн ыраазычылык билдирди.
«Бул жабдуу балдардын заманбап калыбына келтирүүчү дарылоого жеткиликтүүлүгүн кеңейтет жана медициналык жардамдын натыйжалуулугун жогорулатат», — деди министр.
Борбордун директору Шайирбек Сулайманов роботтук аппараттар жакшы натыйжаларды көрсөткөндүгүн билдирди.
"Практика бейтаптардын кыймыл функцияларынын жакшырышын, калыбына келүү мөөнөтүнүн кыскаруусун жана жашоо сапатынын жогорулашын тастыктады. 2024-жылы 1000ден ашуун өнөкөт оорулар менен жабыркаган бала реабилитациялык дарылоодон өттү. Жаңы жабдуулар менен балдар үчүн реабилитациялык программалар кеңеет", - деди дарыгер.
Эске салсак, 2024-жылы H Robotics Кореянын Мамлекеттик сатып алуулар кызматы жана Корея сатып алуулар институту тарабынан каржыланган 20 даана Rebless™ жабдуусун Кыргызстанга өткөрүп берген. Алар ЭжБКУБ, КММАга, Улуттук госпиталга, Жалал-Абаддагы «Бакыт» көп областык реабилитациялык борборуна жана Ысык-Көл облустук бириктирилген ооруканасына бөлүштүрүлгөн.
