Бишкек, 29.06.26. /Кабар/. Кадамжай районунун Ак-Турпак айыл аймагында Кожо-Ашкан дарыясынын жээгин бекемдөө иштери аяктады. Бул тууралуу президенттин Баткен облусундагы өкүлчүлүгүнөн билдиришти.
Аталган маселе Элдик курултайдын делегаттары жана жергиликтүү тургундар тарабынан көтөрүлгөн. Натыйжада дарыянын кооптуу деп эсептелген 4 260 метр тилкесинин 880 метри толугу менен бекемделди. Анын ичинен Чоң-Гара айылында 500 метр, Кызыл-Коргон айылында 380 метр аралык коргоого алынды.
"Жээкти бекемдөө иштеринин алкагында турак үйлөр, короо-жайлар, ички чарбалык жолдор, арыктар жана дыйкандардын эгин талаалары суу ташуу коркунучунан корголду. Буга чейин сугат маалында суунун көлөмү 300 кубга чейин көбөйүп, айдоо аянттарын жууп кеткен учурлар көп катталган", — деп айтылат маалыматта.
Бул максатта республикалык бюджеттен 20 млн сом, Баткен облусун өнүктүрүү фондунан 15 млн сом — жалпысынан 35 млн сом каражат бөлүнгөн.
Белгиленгендей, Кожо-Ашкан дарыясынын бекемделбей калган 3 380 метр аралыгы Баткен облусун өнүктүрүүнүн 2021-2035-жылдарга карата планына киргизилген.
