Бишкек, 17.09.26. /Кабар/. Бүгүн, 17-сентябрда эмгек, социалдык камсыздоо жана миграция министри Алмаз Имангазиев Евразиялык экономикалык комиссиянын (ЕЭК) Эмгек миграциясы жана социалдык коргоо департаментинин директору Айгүл Рыскулова менен жолугушту.
Ведомстводон билдиришкендей, анда тараптар Евразиялык экономикалык бирликтин (ЕАЭБ) алкагында эмгек миграциясы, эмгекчилердин жана алардын үй-бүлө мүчөлөрүнүн социалдык корголушу, ошондой эле Биримдикке мүчө мамлекеттердин жарандарынын укуктарын коргоо багытындагы кызматташтыктын актуалдуу маселелерин талкуулашты.
Министр Кыргызстандын жарандарынын ЕАЭБге мүчө мамлекеттердин аймагында болуу жана эмгек ишин жүзөгө ашыруу шарттарын жеңилдетүүчү механизмдерди өркүндөтүүнүн маанилүүлүгүн белгиледи.
Өз кезегинде Айгүл Рыскулова Кыргызстан менен болгон өз ара аракеттенүүнүн жогорку деңгээлин жана конструктивдүү диалогду белгилеп, ошондой эле эмгек миграциясы процесстерин санариптештирүүгө жана бирдей социалдык кепилдиктерди камсыздоого багытталган комиссиянын учурдагы демилгелери тууралуу маалымат берди.
Жолугушуунун жыйынтыгында тараптар өнөктөштүктү мындан ары да бекемдөөгө умтула турганын ырасташып, социалдык-эмгек чөйрөсүндөгү негизги стратегиялык милдеттерди ишке ашыруу боюнча биргелешкен иштерди улантууну макулдашышты.
