Бишкек, 30.06.25. /Кабар/. Эмгек, социалдык камсыздоо жана миграция министри Равшанбек Сабиров, Жогорку Кеңештин вице-спикери Жылдыз Садырбаева жана Жогорку Кеңештин депутаты Лейла Лурова үй-бүлөлүк зомбулуктан жабыркаган аялдар үчүн ачылган "Эне үйү" борборуна барышты.
Ведомстводон маалымдашкандай, алар борбордо убактылуу жашап жаткан балалуу аялдар менен баарлашып, жашоо шарттары менен таанышып, мындай демилгелерди өлкөдө кеңири өнүктүрүүнү колдой тургандыктарын билдиришти.
Министр Равшанбек Сабиров “Эне үйү” борборунун иш моделинин актуалдуулугун белгиледи.
"Бала багуу системасында бюрократияны азайтуу шартында мындай борборлордун иш ыкмасы өзгөчө мааниге ээ. Биз аялдарды үмүтсүз кырдаалга калтырбай турган шарттарды түзүшүбүз керек. Жаңы төрөлгөн наристесинен шашылыш баш тартууга болбойт. Адам аффект абалында ар нерсени айтышы мүмкүн, бирок эки-үч күндөн кийин: “Бул менин эле балам", – деди ал.
Министрдин айтымында, бул моделди өлкө боюнча жайылтууга министрлик даяр, анткени үй-бүлө институтун сактоо — мамлекеттин өзгөчө көзөмөлүндө турган маанилүү багыт.
Жогорку Кеңештин вице-спикери Жылдыз Садырбаева «Эне үйү» долбоору кризистеги аялдарды ар тараптуу колдоону камсыздай турганын белгилеп өттү.
"Бул борбор баланы эмизүүдө жардам берип, баланын толук кандуу өнүгүшүнө шарт түзөт", - деди депутат.
