Бишкек, 18.05.25. /Кабар/. Эмгек, социалдык камсыздоо жана миграция министри Равшанбек Сабиров Энелер күнүнө карата алты баланы тарбиялап жаткан Ботбаева Назира – SOS-апага фостердик үй-бүлөсүнө барды.
Ведомстводон маалымдашкандай, Назира Ботбаева 2016-жылдан бери альтернативдик камкордук системасында иштеп келет жана бул убакыт аралыгында энелик чексиз сүйүүнүн жана ишке берилгендиктин үлгүсү болуп калды. Анын жолу жеке трагедия менен башталды – жолдошу каза болгондон кийин, ал өз кызы Мээрим да өзүн жалгыз сезбеши үчүн, кароосуз калган балдарга үй-бүлөсүнүн жылуулугун берүүнү чечти.
"Баланы багып, окутуп, тарбиялоо – бул өзүң да үйрөнүп, өсүп, өзгөрүү дегенди билдирет", – дейт көп балалуу эне.
Балдар айылына отурукташканга чейин Назира жарым жылдык стажировкадан өтүп, башка үй-бүлөлөрдү байкап, өз күчүн баалап, фостер-эне болуу чечимин кабыл алган. Бүгүнкү күндө анын үйүндө камкордук, колдоо жана өз ара жардамдашуу атмосферасы өкүм сүрөт. Балдар ийгиликтүү окуп, спорт менен машыгып, чыгармачылык менен алектенип, таланттарын өнүктүрүп жатышат. Алардын арасында музыканттар, спортчулар, сүрөтчүлөр жана бийчилер бар.
Министр Равшанбек Сабиров өлкөдө фостердик камкордук институтунун маанилүүлүгүн белгиледи:
"Назира Ботбаевага окшогон үй-бүлөлөр чыныгы ата-энелик сүйүүнүн жана социалдык жоопкерчиликтин үлгүсү болуп саналат. Министрлик ар бир бала өзүн керектүү жана сүйүктүү сезиши үчүн камкордуктун альтернативдүү түрлөрүн өнүктүрүүнү жана колдоону улантат",-деген.
