Бишкек, 02.09.25. /Кабар/. «Электр станциялары» ААКтын жаңы административдик имараты пайдаланууга берилди. Бул тууралуу Энергетика министрлигинен билдиришти.
Маалыматка ылайык, буга чейин кызматкерлер эскирген имаратта иштеп келишсе, бүгүнкү күндөн тартып алар заманбап стилде салынган жаңы имаратта ишин улай башташты.
Жаңы имаратта компаниянын негизги бөлүмдөрү бириктирилип, жүздөгөн кызматкерлер үчүн эмгек шарттары жакшыртылып, иштин натыйжалуулугу жогорулады.
Замана талабына жооп берген жаңы кеңседе диспетчерлерден тарта инженерлерге чейин кызматкерлерге бардык шарттар түзүлдү. Имаратта бүтүндөй энергетикалык системанын «мээси» болгон борбордук диспетчердик пункт жайгашкан, анда болжол менен 80–90 адис иштейт.
Ошондой эле жабдуулардын техникалык абалын көзөмөлдөөдө маанилүү роль ойногон майларды хроматографиялык анализдөө лабораториясы кайра жанданды.
Жаңы имараттын жалпы аянты 1045,44 кв. метр, 2 кабаттуу. Ар бир кабатта 34 жумушчу орун бар, жалпы 68 жумушчу орун түзүлгөн. Курулуш чыгымдары толугу менен ОАО «Электр станциялары» компаниясынын эсебинен каржыланып, курулушту «Ихтир-Юг» компаниясы аткарды.
