Бишкек, 12.05.26. /Кабар/. Бүгүн Каракол шаарынын мэри Талантбек Иманов тургундарды жеке маселелери боюнча кабыл алды. Бул тууралуу мэриядан билдиришти.
Жолугушууга муниципалдык кызматтардын жана ишканалардын жетекчилери катышып, көтөрүлгөн маселелер жеринде талкууланды.
Кабыл алуунун жүрүшүндө жер тилкелеринин чектерин тактоо жана ички жолдорду оңдоо, Мамлекеттик ипотекалык компания (МИК) аркылуу турак жай алууга көмөктөшүү, көп кабаттуу үйлөрдүн айланасын ирээтке келтирүү жана унаа жуучу жайлардын ишин тартипке салуу, маданий иш-чараларды өткөрүү үчүн жай бөлүп берүү сыяктуу маселелер көтөрүлдү.
Өзгөчө көңүл эл аралык мелдешке даярданып жаткан жаш спортчунун кайрылуусуна бурулуп, шаар башчысы жол кире маселеси боюнча колдоо көрсөтүлөрүн билдирди.
Жолугушуунун жыйынтыгында мэр ар бир кайрылууну мыйзам чегинде ыкчам карап чыгуу боюнча тиешелүү жетекчилерге конкреттүү тапшырмаларды берди.
