Бишкек, 21.07.26. /Кабар/ Нарын шаарындагы “Ала-Тоо” борбордук стадиону толук реконструкциядан өткөрүлүүдө.
Курулуш министрлигинен билдиришкендей, жаңылоо иштери 2025-жылдын июнь айында башталып, каржылоо мамлекеттик бюджеттин эсебинен каралган.
Бүгүнкү күндө курулуш аянтында комплекстүү иштер жүргүзүлүүдө. Административдик корпустун А жана Б блокторунда бетон конструкцияларын орнотуу иштери аяктады. Учурда футбол талаасынын котлованы казылып, жарыктандыруу мамылары орнотулду.
Башкы планга ылайык, стадион 4500 көрүүчүгө ылайыкталып, VIP-коноктор жана жалпыга маалымдоо каражаттарынын өкүлдөрү үчүн атайын аянтчалар каралат.
Ошондой эле эл аралык стандарттарга жооп берген футбол талаасы, заманбап административдик имарат курулуп, айланасын көрктөндүрүү иштери жүргүзүлөт. Стадиондун жалпы аянты 3,5 гектардан ашык жерди ээлейт.
