Бишкек, 22.10.25. /Кабар/. Экономика жана коммерция министрлигинде мамлекеттик сектор үчүн жаңы төлөм системасы — ABilling тааныштырылды.
Ведомстводон маалымдашкандай, инновациялык төлөм системасын "Айыл Банк" ААКтын өкүлдөрү тааныштырды.
Аталган система төлөмдөрдү түзүүгө, каттоого жана башкарууга арналган жана уюмдардын кызматтарын QR-код аркылуу төлөө мүмкүнчүлүгүн да камсыздайт.
Жолугушуунун жүрүшүндө министрликтин карамагындагы түзүмдөр үчүн ABilling системасынын иштөө принциби көрсөтүлүп, анын төлөм процесстерин жөнөкөйлөтүү жана автоматташтыруу боюнча жогорку мүмкүнчүлүгү белгиленди.
Белгиленгендей, бул системаны ишке киргизүү мамлекеттик органдар менен жарандардын өз ара аракеттенүүсүн кыйла натыйжалуу кылууга, заманбап санариптик технологияларды колдонуу аркылуу төлөмдөрдү ыңгайлуу, ылдам жана ачык жүргүзүүгө шарт түзөт.
