Бишкек, 08.04.25. /Кабар/. Екатеринбургда Ч.Айтматовдун чыгармасынын негизинде коюлган "Жоломан, өзүңө кел" спектакли менен Бакен Кыдыкеева атындагы Кыргыз мамлекеттик жаш көрүүчүлөр театрынын гастролу башталды. Бул тууралуу Тышкы иштер министрлигинен билдиришти.
Иш-чаранын ачылышына Кыргызстандын башкы консулу Максат Тентимишов, Екатеринбург шаарынын башчысынын орун басары М.Фадеева, Кыргызстан менен Екатеринбургдун ЖКТларынын директорлору А.Алыбаев жана С.Радченко катышты.
Кыргыз мамлекеттик жаш көрүүчүлөр театры Екатеринбург көрүүчүлөрүнө "Кат – учактар" спектаклин тартуулады.
Спектакль көрүүчүлөр тарабынан чоң кызыгуу жана жылуу кабыл алуу менен коштолду. Көрүүчүлөр Ч.Айтматовдун жана башка жазуучулардын чыгармаларына спектаклдерди даярдоону суранышты. Көрүүчүлөрдүн арасында кыргыз диаспорасынын өкүлдөрү да болду.
Кыргыз мамлекеттик жаш көрүүчүлөр театры КР Екатеринбург шаарындагы Башкы консулдугунун көмөгү менен Россиянын Маданият министрлигинин "Чоң гастролдору" сынагынын жеңүүчүсү болду.
Белгилей кетсек, Бакен Кыдыкеева атындагы Кыргыз мамлекеттик жаш көрүүчүлөр театрынын гастролу 1930-жылдын 1-апрелинде негизделген Екатеринбург жаштар театрынын 95 жылдыгына арналып, юбилейге Москва менен Санкт-Петербургдун, ошондой эле Екатеринбургдун боордош шаарларынын Бишкек жана Минсктин театрлары чакырылган.
