Бишкек, 10.08.25. /Кабар/. Бүгүн президенттин администрациясынын жетекчисинин орун басары – президенттин жана министрлер кабинетинин чечимдерин даярдоо боюнча башкармалыгынын начальниги Азамат Кадыралиев Ош облусуна жумушчу сапары менен келди.
Президенттин аймактагы өкүлчүлүгүнөн билдиришкендей, ал сапардын алкагында ал 31-август – Эгемендүүлүк күнүнө карата пайдаланууга берилүүчү инфраструктуралык жана социалдык объектилердин даярдыгы менен таанышып чыкты.
Азамат Кадыралиевге президенттин өкүлү Элчибек Жантаев Өзгөн – Мырза-Аке – Кара-Кулжа унаа жолунун капиталдык оңдоо иштеринин жүрүшү жана башка объектилер боюнча маалымат берди.
Ошондой эле объектилерди пайдаланууга берүү боюнча көрүлүп жаткан даярдыктар талкууланып, тиешелүү сунуш-пикирлер айтылды.
