Бишкек, 14.08.25. /Кабар/. Кыргызстандын альпинизм федерациясынын президенти Эдуард Кубатов дүйнөдөгү экинчи бийик чоку — Пакистандагы К2 (8611 м) чокусун кычкылтексиз багындырды.
Спортчунун айтымында, ал чокуга 11-август күнү саат 17:00дө жетип, 13-август күнү эртең менен базалык лагерге аман-эсен түшкөн. Кубатов бийиктикке чыгуу оор шарттарда болгонун, айрым катышуучулар түшүүдө оор жаракат алып, бир альпинист каза болгонун белгиледи.
"Жеңишти Эгемендүүлүгүбүзгө арнайм жана биздин улуу элибиздин бир бөлүгү болгонума сыймыктанам! Азыр биз Скарду шаарын көздөй баратабыз. Бир аз ден соолугум начар, бирок мен мекениме кайтып жатам", — деп жазган Кубатов.
Ал чокуга чыккандагы видео жана сүрөттөрдү интернет тарткан аймакка кайтып келгенден кийин жарыялай турганын кошумчалады.
