Бишкек, 07.07.26. /Кабар/. Бүгүн, 7-июлда Суу ресурстары, айыл чарба жана кайра иштетүү өнөр жайы министрлигинде министр Эрлист Акунбековдун катышуусунда аппараттык жыйын өттү.
Ведомстводон билдиришкендей, жыйындын жүрүшүндө министрликтин ишмердүүлүгүндөгү артыкчылыктуу багыттар талкууланып, санариптештирүү иштерин ылдамдатуу, тапшырмаларды өз мөөнөтүндө жана сапаттуу аткаруу, ошондой эле түшүм жыйноо мезгилинде дыйкан-фермерлерге ыкчам көмөк көрсөтүү маселелерине өзгөчө көңүл бурулду.
Эрлист Акунбеков жеңилдетилген насыя берүү программалары тууралуу маалыматтарды аймактардагы дыйкан-фермерлерге кеңири жеткирүү зарылдыгын белгилеп, тиешелүү түзүмдөргө түшүндүрүү иштерин күчөтүүнү тапшырды.
"Дыйкан-фермерлерди колдоо боюнча мамлекет жүргүзүп жаткан саясат ар бир айылдагы өндүрүүчүгө жетиши керек. Жеңилдетилген насыялардын шарттары, аларды алуу тартиби тууралуу маалыматтар толук жана жеткиликтүү түшүндүрүлүшү зарыл. Бул багытта тиешелүү адистер күчөтүлгөн тартипте иш алып барсын", — деди министр.
Жыйындын соңунда министр бардык түзүмдүк бөлүмдөрдүн жетекчилерине берилген тапшырмалардын өз убагында аткарылышын камсыз кылууну жана иштердин натыйжалуулугун жогорулатууну милдеттендирди.
