Бишкек, 10.08.26. /Кабар/. Дүйнөлүк саламаттык сактоо уюмунун эксперттик тобу Эболанын Бундибуджио вирусуна каршы "Эрвебо" вакцинасын клиникалык сыноого киргизүүнү сунуштады. Бул тууралуу Казинформ БУУнун жаңылыктар кызматына шилтеме берип билдирди.
Сунуш Конго Демократиялык Республикасында уланып жаткан Эбола эпидемиясынын шартында берилди. "Эрвебо" учурда Эболага каршы катталган жалгыз вакцина болуп саналат жана Заир штаммына каршы колдонулат.
Эксперттердин айтымында, жаныбарларга жүргүзүлгөн алгачкы изилдөөлөр вакцина Бундибуджио вирусуна каршы белгилүү деңгээлде кайчылаш коргоо бере аларын, анын ичинде оорудан каза болуу коркунучун азайтарын көрсөткөн.
Ошол эле учурда вакцинанын Бундибуджио вирусунан келип чыккан оорудан жана анын жугушунан коргоодогу натыйжалуулугу азырынча толук далилдене элек. ДССУ атайын ушул штаммга каршы иштелип чыккан вакцинаны артыкчылыктуу вариант катары эсептейт.
Эксперттер "Эрвебону" Бундибуджио вирусун жуктургандар менен байланышта болгон адамдарды эмдөө максатында рандомизацияланган клиникалык сыноонун алкагында колдонууну сунушташты.
