Бишкек, 14.08.26. /Кабар/. Свердлов районунда мыйзамсыз орнотулган жарнама конструкциялары алынууда. Бул тууралуу муниципалитеттен билдиришти.
Маалыматка ылайык, 12-августта Свердлов районунун аймагында тышкы жарнамаларды жана маалыматтык көрнөк-жарнактарды жайгаштырууда дизайн-коддун талаптарынын сакталышын камсыз кылуу иштери жүргүзүлдү.
Иш-чаранын алкагында Курманжан датка көчөсүнүн Жибек Жолу проспектисинен Чоң Чүй каналына (БЧК) чейинки тилкесинде, чыгыш тарабында, колдонуудагы талаптарды бузуу менен өз алдынча орнотулган 168 жарнамалык конструкция демонтаждалды.
"Урматтуу ишкерлер жана мүлк ээлери! Жарнама конструкцияларын жайгаштыруунун мыйзамдуулугун алдын ала текшерип, объекттердин сырткы жасалгасын бекитилген талаптарга ылайык келтирүүгө чакырабыз",-деп айтылат маалыматта.
