Бишкек, 26.06.25. /Кабар/. Балыкчы — Чолпон-Ата — Корумду унаа жолунун 77,5-81,4 — чакырым аралыгы толук реконструкцияланды. Бул тууралуу Транспорт министрлиги билдирет.
Сөз узундугу 3,9 чакырымды түзгөн Чолпон-Ата шаарынын борбордук көчөсү тууралуу болуп жатат.
Жол оңдоо иштери “Кыргызавтожол — Түндүк” мамлекеттик ишканасы жана “Чайна Роуд энд Бридж Корпорейшн” компаниясы тарабынан жүргүзүлдү.
Долбоорго ылайык, 4 тилкеден турган жолдун ар бир тилкеси 3,5 метр болуп, жалпы унаа жүрүүчү бөлүктүн туурасы 14 метрди түздү. Эл аралык макамга ээ болгон бул жолдун интенсивдүүлүгүн эске алып, жүк көтөрүмдүүлүгүн жогорулатуу максатында алгач 9 см калыңдыктагы асфальттын жогорку катмары төшөлдү.
Долбоордо каралган 100дөн ашык суу өткөрүүчү түтүктөрдү орнотуу, жол четинде лотокторду жана бордюр таштарды коюу, аялдамаларды жана жолдун эки тарабына унаа токтотуучу жайлар менен тротуар куруу, 2 көпүрөнү оңдоо иштери толук жыйынтыкталды.
Ошондой эле Чолпон-Атанын борбордук көчөсүн жарыктандыруу жумуштары аткарылды.
