Чолпон-Ата, 28.05.26. /Кабар/. Бүгүн, 28-майда Чолпон-Ата шаарында Шанхай кызматташтык уюмуна мүчө мамлекеттердин аймак жетекчилеринин V форуму жана боордош шаарлардын башчыларынын жолугушуусу башталды.
Форумга экономика жана коммерция министринин биринчи орун басары Чоро Сейитов жетекчилик кылууда.
Форум ШКУга мүчө мамлекеттердин ортосундагы аймактар аралык кызматташтыкты чыңдоо, соода-экономикалык, инвестициялык жана гуманитардык байланыштарды кеңейтүү, ошондой эле шаарлар менен аймактардын ортосундагы өнөктөштүктү өнүктүрүү боюнча маанилүү эл аралык аянтча болуп саналат.
Иш-чарага Кыргызстан, Кытай, Өзбекстан, Россия, Тажикстан, Казакстан, Иран, Беларусь, Индия, Пакистан жана ШКУ катчылыгынын расмий делегациялары катышууда.
Форумдун алкагында алар аймактар аралык кызматташтыкты өнүктүрүү, инвестициялык жана соода-экономикалык байланыштарды кеңейтүү, санариптештирүү, туризм, туруктуу өнүгүү жана ШКУга мүчө мамлекеттердин ортосундагы маданий-гуманитардык алакаларды чыңдоо маселелерин талкуулашат.
Иш-чаранын жыйынтыгында ШКУга мүчө мамлекеттердин шаарлары жана аймактарынын ортосунда кызматташтык тууралуу бир катар меморандумдарга кол коюу күтүлүүдө.
