Бишкек, 28.07.25. /Кабар/. Чолпон-Ата шаарында Курулушта сертификаттоонун республикалык борборунун сыноо лабораториясы ачылды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Ведомстводон белгилешкендей, өлкө аймагындагы курулуштардын көлөмү жылдан-жылга көбөйүп жаткандыгына байланыштуу курулуш объектилеринин сапаты биринчи орунда болушу шарт.
Мындан улам Курулуш министрлиги курулуш иштеринин маселесин жеринен ыкчам чечүү, текшерүү, көзөмөлдөө максатында бул ирет Чолпон-Ата шаарына сыноо лабораториясын ачып, пайдаланууга берди.
Жаңы ачылган лабораторияда тиешелүү жабдуулар, адистер үчүн бардык шарттар жана көчмө курулуш лаборатория машинасы каралган.
Мындан ары Ысык-Көл облусу боюнча курулуш иштеринин сапатын текшерүүдө оперативдүү сыноо иштери жүргүзүлөт.
