Бишкек, 21.05.26. /Кабар/. Чолпон-Ата айланма унаа жолунун курулушу планга ылайык жүрүүдө. Бул тууралуу Транспорт жана коммуникациялар министрлигинен билдиришти.
Маалыматка ылайык, жолдун узундугу 15,64 чакырымды түзүп, 4 тилкелүү болуп курулууда. Курулушта 123 атайын техника жана жабдыктар үзгүлтүксүз иштеп жатат.
"Учурда жол жээгин тазалоо жана бадалдарды жулуп тазалоо, жер жумуштары аткарылууда. Курулуш алкагында 791 миң куб метр казылган топурак үймөккө чыгарылып, карьерден алынган материалдар менен 76,4 миң куб метр жер тосмосу курулду", - деп айтылат маалыматта.
Ошондой эле Өрнөк айылында асфальт-бетон заводу жана майдалоочу-сорттоочу орнотмо мобилизацияланып, битум кудугу даярдалды.
Долбоор боюнча 45 суу өткөрүүчү түтүк каралган. Ал эми ПК 35+51 дарегиндеги көпүрөдө тирөөчтөрдүн астын казуу иштери дээрлик аяктап калды.
