Бишкек, 27.02.25. /Кабар/. Чүйдө айдоо жерине мыйзамсыз 9 үй куруп алышкан.
Суу ресурстары, айыл чарба жана кайра иштетүү өнөр жайы министрлигинен билдиришкендей, Жерди жана сууну көзөмөлдөө кызматы тарабынан Чүй облусундагы Кара Жыгач айыл аймагынын №9 жана №10 контурунда жайгашкан айыл чарба багытындагы айдоо жери максатсыз пайдаланылып келгени аныкталды.
Тактап айтканда, аталган жерге белгисиз жарандар тарабынан 5 пайдубал, 9 үй жана 1 тиричилик имараты курулган, ошондой эле, жол салуу максатында узуну 425 метр, туурасы 6 метрди түзгөн сугат айдоо жерине кум-шагыл төгүлгөнү аныкталды.
Текшерүүнүн жыйынтыгында, жогоруда аталган белгисиз жарандардын аракеттеринде кылмыш белгилери болушу мүмкүн экендигине байланыштуу, Кыргыз Республикасынын “Кылмыш-жаза” кодексинин 212-беренесинин негизинде жогоруда аталган участоктор боюнча материалдарды кароо жана тиешелүү процессуалдык чечим кабыл алуу үчүн Чүй ОИИБге өткөрүлүп берилди.
